خلال أسبوعين كل يوم فيهم أرجع البيت بعد مسيرة أو مؤتمر لرفض المحاكمات العسكرية للمدنيين أو من التحرير ، أقابل في طريقى للبيت سواق تاكسى أو ناس في الشارع أو في المترو ممن اجتمعت علي تسميتهم" ضحايا التعليم المجانى" وتعريف مبسط ومختصر للفئة التى تجاوز تسميتها- في رأيى- حزب الكنبة " هم ناس اتعودوا يستقبلوا المعلومات فقط ، ويأخذو الأراء بمعلقة في بوقهم ، بالفلكة والخرزانة اتعلموا يحترموا السلطة ويعبدوها ، بل الأسوأ وقت ما تيجى لهم فرصة أن ناس غيرهم يكسروا الصنم ، تلاقيهم بيلموا فتافيته وبسرعة يكونوا مسخ لصنم جديد...لدول اللى مش بينتموا لفئة عمرية أو اقتصاية أو اجتماعية أوشكلية أوجندرية معينة...اللى تلاقي فيهم أستاذ الجامعة وأبوك وجوزك أو مراتك أو رئيسك في الشغل أو اللى راكب جنبك في الميكروباص وأنت راجع مطحون من التحرير وهو بيتهمك أنك أجندة وبلطجى وأجنبى ومندس...
..باكتب لعل الفهامة تشتغل وتفهموا عشان لما أموت في التحرير أمى قلبها ما يتحرقش عليا لما تحس أنى مت عشان ضحايا التعليم المجانى يبنوا الصنم من جديد :
- المجلس العسكرى ...مش أنتوا اللى جبتوه
اللى جاب المجلس العسكرى نخبة القوى السياسية اللى ماكنتش علي مستوى الثورة وما قدرتش تتوحد حول شخصية مثل البرادعى أو أبو الفتوح أو حسام عيسى وغيرهم من الناس المحترمة ..النخبة اللى ما كنتش علي مستوى الحدث ..وكان أخرها تعارض مبارك في مقال ،ماكنتش متصورة أن الشعب اللى مالوش فى السياسية أشجع منها وثار، إذن أنا ماكنتش قدامى كثائرة ما أنتميش لحزب أو حركة سياسية غير أنى أقبل بالعسكر كحل مؤقت ما يزيدش عن 6 شهور خلالهم تتسلم السلطة لرئيس وده طبعا ما حصلش.
- المجلس العسكرى مش أفضل مؤسسة في مصر ....
رجال وثق فيهم مبارك اختارهم ووضعهم في مكانهم الصحيح ، لإفشال الثورة ،هم رجال من عهد مبارك ، واللى اعرفه ان مبارك كان بيختار أهل الثقة مش أهل الخبرة والكفاءة ..يعنى لازم اللى يتحط في منصبة يكون من رجالته ولو ما كانش كده كان بيشيله ..احنا سكتنا علي فسادهم وقلنا نعدى المرحلة ويرجعوا زى ما كانوا في ثكناتهم ..لكن هما اتعاملوا مع صبرنا وجميل الشعب المصرى عليهم ..بوقاحة وقلة أدب ووشغل صهاينة .
- المجلس العسكرى حمى الثورة ..وما عملش فيكم زى ليبيا
المجلس العسكرى حاكم أكثر من 12 ألف مدنى قدام المحاكم العسكرية ، بينما حسنى مبارك بيتحاكم مدنى ، المجلس العسكرى مدرعاته دهست الشعب المصرى لأول مرة في تاريخ مصر، المجلس العسكرى اعتد على شرف بنات مصر ، وعذب الثوار في المتحف المصرى ،معركة الجمل حدثت والمجلس وقواته كانت في ميدان التحرير، وأخيرا الشرطة العسكرية اعتدت السبت اللى فات علي صديقتى الطبيبة خلال ذهابها للمستشفى الميدانى ،تحب أقولك ايه تانى.
- المجلس العسكرى كان هيسلم السلطة انتوا اللى مش عاوزين انتخابات وديمقراطية
المجلس العسكرى عملك وثيقة مبادئ دستورية حط فيها مواد عشان يبقى لديه دور سياسى بعد كده ويتحكم في اى برلمان أو رئيس يجى ونكرر مأساة تركيا اللى فضلت في صراع بين الجيش والسياسين فترة طويلة ،المجلس العسكرى ما أصدرش قانون العزل السياسى عشان هو والفلول أيد واحدة ،ولما هددوا في مؤتمر في الصعيد بحرق مصر لو صدر القانون ...المجلس لبس الطرحة وعمل نفسه مش واخد باله.
- مافيه ناس محترمة زى سليم العوا وحازم أبو إسماعيل والإخوان مع التهدئة..مش دول كانوا في الثورة برضة
العوا ورفاقة الإسلاميين بدأوا جولة لحس جزمة المجلس العسكرى اللى مسك منهم الرايه بعديها حزب الوفد والتجمع وباقى أشباه الليبرالين واليسارين ، دول لابسين بدلة من فوق وبوكسر من تحت ، شخصيات مشوه ، الثورة غربلت الكتير وهتوقع كل يوم صنم لواحد كنا فاكرينه كان محترم ...انا بحترم كل فرد نزل إسلامى أو ليبرالى أو علمانى أو كافر مهموش رأى الحزب الخسيس اللى حط إيده في جزمة العسكرى عشان كام كرسى في البرلمان .
- هو انتوا هتحجروا على الشعب مين قالكم أنهم كانوا هينتخبوا الفلول أو التيار الإسلامى بس
الثورة ما حكمتش ..لو انت شايف اى حد من الثوار حكموا اخرم عينى ..لو فيه قانونين ثورية حصلت تعال كلمنى ..إذن الواقع علي الأرض هو هو ..مين بقى اللى كان بيعلب في الانتخابات اللى فاتت مع بعض ما يتخانقوش الإخوان والوطنى سابقا " الفلول حاليا" .
- المجلس العسكرى ...مش لاقى حد يتكلم معاه من الثوار وكل شوية برأى و موقف
اتفق معاك أن القوى السياسية من مصايب وانجازات مبارك اللى هيفضل أحفادنا يدعو عليه لكم المجلس لعب لعبة وسخة أوى أول ما مسك الحكم ، وقسم الشعب اللى مؤيد الثورة ومطالبها حتى حزب الكنبة فيه بعد خلع مبارك طلعوا يقولوا احنا كنا مع الثورة بس خايفين علي مصر، قام المجلس عمل استفتاء وقسم الكلمة واحدة اتنين ..وقام رامى الاستفتاء في الزبالة وعمل إعلان دستورى ولأخد بكلام اللى قالوا نعم واللى قالوا لأ ..ومن يومها وهو يبلعب بوساخة علي مستوى عالى عالى الصراحة يضرب القوى السياسية التعبانة شويةيلعب مع الإسلاميين ..وشوية الليبراليين واليسارين ..وفي الآخر يقولك المشير ائتلافات شباب الثورة مختلفة ..زى شغل الصهاينة اللى قسم الفلسطينين فصائل وبعد كده يقولك أنا هقعد مع مين فيهم.
- عصام شرف جه من الميدان ...أنتوا غدارين وكل ما يجى حد هتطالبوا تغييره
الديمقراطية معناه أنى أخد قرار ولو طلع القرار غلط أصلحة مش ألبس فيه تلاتين سنة زى نظام مبارك ...احنا ما اتجوزناش "عديم الشرف" جواز كاثوليكى ومش هينفع نتطلق ده رئيس وزراء اثبت فشله واحنا بنقول كفاية أوى ..خد جنب انت ومجلس العسكرى اللى بيحركك زى عرايس الماريونت عاوزين رئيس وزراء بصلاحيات حقيقة مش كارتون ، ثانيا احنا بالأساس مصيبتا في المجلس العسكرى يعنى لو فيه نبى جه رئيس وزراء والعسكر بيحكموا مش هيجيب أكتر من اللى شرف عمله ، زى ما مشكلتنا ما مبارك مش مع أحمد نظيف ، مشكلتى مع المشير وعصابته .
- أنتوا بتضربوا علي الجنود والظباط طوب عاوزينهم يبوسوكوا يعنى
هتقارن بين طوبة وقنبلة وخرطوش ورصاص حى في العين والقلب والصدر..هتقارن بين واحد لابس مدرعات وواحد بصدر عارى وبكل بسالة بيرمى طوب علي ولاد الحرام اللى طحنوا مصابى الثورة في فض اعتصام السبت .
- دول بلطجية مدفوع لهم فلوس ..دول مش ثوار 25 يناير
مين البلطجى اللى هتدفع ليه فلوس عشان يضحى بحياته أو يفقد عينه ويعيش بعاه ..مين البلطجى اللى هيستحمل يشم غازات سامة كل يوم بيجيبوا نوع جديد منها وأنا ما استحملتهاش وأصحابى إمبارح وم قدرناش ننزل تانى يوم .
- ومطلبكم إيه...
مطلبنا واحد نقل السلطة حالا لرئيس المحكمة الدستورية العليا أو رئيس المجلس الأعلي للقضاء وتشكيل حكومة ائتلافية من شخصيات محترمة رفضت تبقى لعبة في إيد العسكر زى البرادعى وأبو الفتوح وحسام عيسى ، ونعمل الانتخابات البرلمانية ونخلص ونعمل مجلس تأسيسى للدستور زى تونس ، المجلس لازم يمشى لأن العسكر ما يعرفوش غير إصدار الأوامر ..وإنجازاتهم في أقل من سنة فاقت إنجازات عهد رفيقهم مبارك .
- مين في الميدان ....
أنا في الميدان وأصحابى وأهلي ..ناس عادية بشجاعة بتلم تبرعات عشان الأكل والدوا ..وناس أشجع تانى علي خطوط المواجهة مع ولاد الحرام " الشرطة العسكرية والأمن المركزى في شارع محمد محمود اللى هو مش شارع وزارة الداخلية واللى لو كنا عاوزين نقتحهم كنا بسهولة هندخل من الشارع ريحان ونولع فيهم بجاز وسخ زيهم ... في الميدان محمد طالب كلية الحقوق اللىى قالى امبارح أنا نزلت عشان حق البنت اللى ضربوها وشدوها من شعرها والشهيد اللى رموها في الزبالة ...أنا واحدة نزلت بروفة الثورة في يناير ومش هسمح إن دمى أخواتى "مسلم ومسيحى "يروح هدر ...أنا واحدة كفرت بالإيدلوجيات والأحزاب والزعماء والقادة ...مؤمنة بفكرة الثورة ...مؤمنة أن من حق ولاد أخواتى يعيشوا في كرامة وحرية وعدالة اجتماعية ...عشان أنا ممكن أموت بكره علي إيدهم بس ساعتها مش هيتقال عنى بلطجية ..عرفت احنا مين.
ملحوظة : الدليل مش حصرى ..انشره علي قد ما تقدر اطبع ووزع علي التاكسيات والمحلات والقهاوى والمترو عند أصحابك علي الفيس بوك وتويتر ، لو عاوز تغيير حاجة أو تضيف فيه اعمل كده ..بس المهم تكون إضافة تفضح العسكر وتفتح الدماغ المقفولة
